Pidarta Bahasa Bali

`BUDAYA BALI PATUT LESTARIANG`


Inggih suksma majeng ring pengenter acara antuk galah sane kapaice ring sikian titiang. Sane kusumayang Bapak bupati Klungkung utawi sane ngangganin sane mresidayang rauh raninane mangkin, sane dahat wangiang titiang juru panureksa, sane wangiang titiang para pamilet pacentokan, lan para semeton sinamian sane tresna sihin titiang. Ring galahe sane becik sekadi mangkin titiang jagi ngaturang pidarta sane mamurda “ BUDAYA BALI PATUT LESTARIANG “. Sedurunge titiang ngawitin, pinih riin titiang ngaturang puja pengastung kara.
“ OM SWASTYASTU “
Sembah bakti aturang titiang majeng ring ida sang hyang widhi wasa riantukan sangkaning asung kerta wara nugrahan ida, titiang ping kalih Ida dane prasida mapupul iriki ring pacentokan mapidarta puniki rahina sukra, 26 Maret 2010.
Ida dane sinamian, yening katilikin ring aab jagate sekadi mangkin, makeh para krama ring Bali sampun nenten urati tekening kebudayaan Bali iragane, sane mapuara prasida budaya Bali punika sayan-sayan rered ring angga soang-soang. Punika mawinan jengah manah titiange mangda prasida budaya Bali punika kalestariang lan sayan-sayan nglimbak.
Ida dane para semeton titiang sareng sinamian, ngiring sareng sami mulat sarira, nyiksik bulu, uning ring raga soang-soang, sampun ke ida dane urati lan sutindih ring kebudayaan Bali iragane? Kesujatian ipun wantah swadarmaning iraga sareng sami. Para wisatawane ngantos angob ring kebudayaan Bali iragane sane dahat ngulangunin pisan tur makeh ipun rauh ke Bali sangkaning marasa dot pisan ngantenang kebudayaan Bali iragane.
Para semeton titiang sareng sinamian, utamanyane para generasi muda sumangdane stata mautsaha nglestariang budaya Bali drewene. Nelebin basa lan sastra bali punika silih sinunggil sampun kaucap nglestariang budaya bali, sampunang iraga dados jatma Bali nenten uning mabasa Bali tur ngajum sane madan basa dura Negara minekadi basa inggris, basa jepang miwah basa sane tiosan, boya je punika sami nenten dados, sakewanten iraga patut ngutamayang basa Bali.
Inggih para semeton titiang sareng sinamian, sios ring punika wawu, taler makeh sane prasida kelaksanayang jalaran nglestariang budaya Bali minekadi malajahin kesenian bali inggih punika : seni tabuh, seni tari, mekidung, makekawin, miwah sane tiosan. Yen sampun sekadi asapunika kalaksanayang sinah kubudayaan Bali iragane nenten ngantos ical tur prasida sayan-sayan nglimbak. Iraga pinaka yowana patut urati lan sutindih ring kebudayaan bali iragane sane mapuara presida ngajegang Bali. Sampunang iraga pinaka yowana maparilaksana sane boya-boya inggih punika nganggen madat utawi obat-obatan terlarang, mapunyah-punyaan, maiyegan ring margi-margi, sane prasida nguugang Negara kesatuan iragane. Patut punika samian ejohin tur peagehin ragane antuk budi pakerti sane becik, keret indriane, paras-paros masawitra, tur elingang stata nglestariang miwah ngajegang budaya Bali drewene mangdane budaya Bali iragane sayan-sayan nglimbak. Titiang mapangapti dumagi je iraga sareng sami prasida nglestariang budaya Bali sampun ketamiang.
Inggih ida dane para semeton titiang sareng sinamian, wantah asapunika sane prasida aturang titiang rahinane mangkin teler titiang nunas geng rena sinampura yening wenten keiwangan atur titiang. Dumogi napi sane kabaosang titiang iwawu prasida manggihin kawigunan ring angga soang-soang. Pinaka wasananing atur sineb titiang antuk paramasantih.

Om Santih, Santih, Santih Om



Kekaryanin olih;
I Komang Ari Subawa
Gunaksa,Dawan-Klungkung.